Sulmuesi i Kombëtares shqiptare, Armando Broja, pritet të largohet nga skuadra e Burnley-t gjatë merkatos së verës, pasi nuk dëshiron të vijojë karrierën në kategorinë e dytë angleze, EFL Championship.
Sipas informacioneve të fundit, klubi i Lazios në Serie A ka nisur kontaktet e para duke kërkuar të dhëna zyrtare mbi çmimin e kartonit të 24-vjeçarit.
Operacioni financiar për transferimin e tij vlerësohet të shkojë rreth 10-12 milionë euro, ku si formulë fillestare po konsiderohet mundësia e një huazimi me të drejtë apo detyrim blerjeje.
Nga ana tjetër, Burnley synon të rikuperojë një pjesë të shumës prej 22 milionë eurosh që investoi për blerjen e tij gjatë verës së kaluar.
Pavarësisht interesimit të shfaqur nga disa klube të tjera europiane përgjatë javëve të fundit, Lazio është pozicionuar tashmë në mënyrë konkrete për të siguruar shërbimet e sulmuesit. Tratativat pritet të hyjnë në një fazë më të avancuar në ditët në vijim.
