Celtic fitoi titullin kampion në Skoci për të pestin sezon radhazi, pasi mposhti Hearts me rezultatin 3-1 në javën e fundit të kampionatit.
Përballja në “Celtic Park” ishte vendimtare për titullin dhe u luajt deri në minutat e fundit. Hearts kishte hyrë në këtë sfidë si kryesuese e kampionatit dhe i mjaftonte edhe një barazim për të fituar titullin e parë kampion që nga viti 1960.
Ekipi i Derek McInnes kishte kryesuar renditjen që prej muajit shtator dhe kërkonte të bëhej skuadra e parë jashtë “Old Firm” që fiton kampionatin skocez pas Aberdeen në vitin 1985.Hearts kaloi në avantazh në fundin e pjesës së parë me Lawrence Shankland, i cili shënoi me kokë pas një goditjeje këndi të Kingsley.
Celtic barazoi në shtesën e pjesës së parë me Arne Engels nga pika e penalltisë, pas një prekjeje me dorë të Alexandros Kyziridis.
Në pjesën e dytë, vendasit dominuan lojën dhe gjetën golin e avantazhit në minutën e 88-të me Daizen Maeda, pas një aksioni që u konfirmua nga VAR.
Në kohën shtesë, Callum Osmand realizoi edhe golin e tretë për Celtic në kundërsulm. Me këtë sukses, Celtic shkoi në kuotën e 56 titujve kampionë në histori, duke kaluar Rangers.
Trajneri Martin O’Neill arriti kështu të fitojë sërish kampionatin me Celtic, në atë që mund të jetë ndeshja e tij e fundit në pankinë.
Nga ana tjetër, Derek McInnes e mbylli sezonin në vendin e dytë me Hearts, pas një kampionati ku skuadra e Edinburgut qëndroi për muaj të tërë në krye të renditjes dhe luftoi për titull deri në javën e fundit.
