Lënia e Thomas Strakoshës jashtë listës së AEK-ut të Athinës për sfidën e parë në Champions League ngriti pikëpyetje të mëdha mbi gjendjen e tij fizike.
Vendimi i trajnerit Marko Nikolic i la të gjithë të shtangur, ndonëse skuadra greke ia doli të triumfonte 1-0 përballë LASK-ut.
E përditshmja greke “Sport24” ka zbardhur prapaskenat e këtij vendimi duke zbuluar diagnozën e plotë të dëmtimit të portierit kuqezi.
Gardiani 31-vjeçar ka pësuar një thyerje në kyçin e dorës që e detyron të qëndrojë disa javë jashtë fushave të lojës. Strakosha do të humbasë tre ndeshjet e radhës në kampionat ndaj Asteras Tripolis, Panserraikos dhe Volos.
Periudha e tij e rikuperimit pritet të zgjasë deri në ndalesën e kampionateve për shkak të ndeshjeve ndërkombëtare.
Rikthimi i tij me fanellën e AEK-ut synohet në muajin tetor në sfidën e Superkupës së Greqisë ndaj OFI-t.
Ky dëmtim krijon shqetësim edhe për Kombëtaren Shqiptare, e cila luan në fund të shtatorit ndaj Bjellorusisë dhe San Marinos.
