Paulo Dybala mund të qëndrojë te Roma, ndonëse kontrata aktuale me klubin verdhekuq i skadon më 30 qershor. Vetë Dybala, para derbit të fituar ndaj Lazios, kishte deklaruar se ajo ndeshje mund të ishte e fundit për të në “Olimpico” me fanellën e Romës. Një deklaratë që shtoi dyshimet mbi vazhdimësinë e tij në kryeqytetin italian, megjithëse pista e rinovimit mbetet ende e hapur.
Një nga faktorët kryesorë që pritet të ndikojë në vendimin final është kualifikimi i Romës në Champions League. Për klubin, pjesëmarrja në kompeticionit më të rëndësishëm europian do të kishte ndikim të madh në aspektin ekonomik, projektin sportiv dhe të ardhurat nga sponsorët dhe të drejtat televizive. Pikërisht për këtë arsye, pozicioni në renditje pas javës së fundit të Serie A konsiderohet vendimtar edhe për të ardhmen e Dybalës.
Sipas informacioneve që qarkullojnë pranë klubit, sulmuesi argjentinas ka shfaqur gatishmëri për të vazhduar bashkëpunimin med Romën. Dybala do të pranonte një ulje të ndjeshme të pjesës fikse të pagës dhe një formulë të re kontrate të bazuar më shumë te bonuset për paraqitjet dhe performancën në fushë.
Kjo lëvizje shihet si një sinjal pozitiv nga ana e lojtarit, i cili ka treguar dëshirën për të vazhduar projektin në kryeqytetin italian. Megjithatë, drejtuesit e klubit kanë preferuar të shtyjnë çdo vendim deri në mbylljen e sezonit dhe qartësimin e objektivave sportive.
Në këtë situatë, në Romë ishte edhe agjenti i Dybalës, Carlos Novel. Ai mbërriti në kryeqytetin italian për të qenë pranë lojtarit dhe për të ndjekur derbin ndaj Lazios në stadiumin Olimpico. Gjatë qëndrimit të tij pati kontakte me drejtuesit e klubit, por pa zhvillime konkrete në lidhje me rinovimin.
Pas takimeve, agjenti u largua nga Roma pa një marrëveshje zyrtare, ndërsa palët kanë vendosur që bisedimet të vazhdojnë pas javës së fundit të kampionatit. Për momentin, as klubi dhe as lojtari nuk duket se kanë ndërmend të mbyllin përfundimisht raportin.
Në planin sportiv, Dybala mbetet një nga lojtarët më të rëndësishëm të skuadrës, si për cilësinë teknike ashtu edhe për ndikimin në repartin ofensiv. Për këtë arsye, Roma do të duhet të balancojë aspektin financiar me nevojën për të ruajtur një nga futbollistët kryesorë të projektit.
Gjithçka pritet të sqarohet në ditët e ardhshme, kur sezoni të jetë mbyllur dhe klubi të ketë një panoramë më të qartë për objektivat dhe buxhetin e sezonit të ardhshëm. Deri atëherë, e ardhmja e Paulo Dybalës mbetet ende pezull.
