Situata e Kristjan Asllanit te Besiktas po ndërlikohet ndjeshëm, duke vënë në pikëpyetje të ardhmen e tij në Stamboll.
Mesfushori i Kombëtares shqiptare ka humbur vendin në formacionin titullar dhe klubi turk duket se ka ndryshuar planet për merkaton e verës. Sipas raportimeve të fundit, Besiktas nuk është më i gatshëm të paguajë shifrën prej 11 milionë eurosh për blerjen e kartonit të tij nga Interi, duke kërkuar një ulje drastike të çmimit në 5.5 milionë euro.
Megjithatë, prioriteti i ri i klubit është rikthimi i portugezit Gedson Fernandes nga Spartaku i Moskës, lëvizje që do të shpenzonte pjesën më të madhe të buxhetit për mesfushën.
Kjo strategji e re pritet të mbyllë hapësirat për një investim te Asllani, duke e detyruar këtë të fundit të kërkojë një destinacion të ri pas përfundimit të sezonit.
Mungesa e minutave dhe ndryshimi i objektivave të klubit e bëjnë pothuajse të sigurt largimin e tij nga Turqia.
