Gara për një vend në Champions League në Itali, është bërë më e ashpër, pas javës së parafundit, që rezervoi rezultate surprizë.
Skuadra e Juventusit ka zbritur në vendin e gjashtë në kuotën e 68 pikëve. Ky pozicionim erdhi pas humbjes së pësuar në shtëpi përballë Fiorentinës me rezultatin 0-2.
Kjo disfatë e bardhezinjve u shfrytëzua nga Roma dhe Como, të cilat arritën të fitonin përballjet respektive. Verdhekuqtë morën tri pikë të arta në derbin kundër Lazios, duke triumfuar me shifrat 2-0 falë dy golave të shënuar nga Mancini.
Pas këtij suksesi, Roma ngjitet në vendin e katërt me 70 pikë dhe një fitore në javën e fundit i garanton kualifikimin në Champions. Në të njëjtën kuotë pikësh ndodhet edhe Milani i vendit të tretë, që fitoi në transfertë 1-2 kundër Genoas. Golat e shënuar nga Nkunku me penallti dhe Athekame i dhanë fitoren skuadrës së drejtuar nga Massimiliano Allegri.
Skuadra e Comos mban aktualisht vendin e pestë me 68 pikë, pas suksesit minimal 1-0 të arritur ndaj Parmës. Ndërkohë, Napoli ka siguruar zyrtarisht pjesëmarrjen në edicionin e ardhshëm të Champions League.
Ekipi i udhëhequr nga Antonio Conte mposhti Pisan me rezultatin 3-0 dhe ruan vendin e dytë me 73 pikë në klasifikimin e përgjithshëm.
