Një hetim i publikuar nga “Il Fatto Quotidiano” ka zbuluar një transaksion pasurish të paluajtshme në qendër të Milanos, që përfshin familjet e dy drejtuesve më të lartë të futbollit, Presidentit të UEFA-s, Aleksander Ceferin dhe ish-presidenti i Federatës Italiane, Gabriele Gravina.
Në dhjetor të vitit 2025, vajza e presidentit të UEFA-s bleu për rreth 670 mijë euro një apartament prej 80 metrash katrorë në lagjen “Porta Venezia”, i cili ishte në pronësi të vajzës së ish-presidentit të FIGC.
Kjo pronë ishte blerë fillimisht në vitin 2019 për 650 mijë euro, në një kohë kur ndaj Gravinës po kryheshin verifikime mbi operacione financiare që lidheshin me të drejtat televizive.
Ceferin ka deklaruar se blerja është kryer në mënyrë plotësisht ligjore dhe sipas vlerës së tregut për nevojat e studimit të vajzës së tij. Nga ana tjetër, mbrojtja ligjore e Gravinës ka theksuar se klienti i tyre është i huaj për çdo akuzë dhe se prona nuk kishte asnjë kufizim ligjor.
Megjithatë, dyshimet e ngritura në media aludojnë për prapaskena politike që mund të lidhen me mbështetjen e UEFA-s ndaj federatës italiane. Vetëm pak ditë më parë, UEFA kërkoi nga Italia që të mos ketë ndërhyrje të jashtme në punët e Federatës, në një kohë kur kanë nisur hetimet për favorizim të arbitrave ndaj Interit.
Ky rast ka tërhequr vëmendjen për shkak të raporteve të ngushta mes dy protagonistëve në një moment delikat për qeverisjen e futbollit.
