Një detaj i pazakontë në rrugët e Seattle në SHBA, ka rindezur shpresat e tifozëve italianë për një pjesëmarrje të mundshme në Botërorin.
Autoritetet vendore kanë shpalosur flamujt e shteteve pjesëmarrëse, por kanë lënë jashtë atë të Iranit, duke vendosur në vend të tij flamurin e Italisë. Ky veprim ka bërë xhiron e rrjeteve sociale, duke u interpretuar si një sinjal politik ose një “gabim” i qëllimshëm që paralajmëron zëvendësimin e Iranit.
Edhe pse presidenti Donald Trump dhe kreu i FIFA-s, Gianni Infantino, e kanë cilësuar më parë si të pamundur këtë skenar, Paolo Zampolli, i dërguari i administratës Trump, këmbëngul për të kundërtën. Zampolli deklaroi se shanset që Italia të udhëtojë drejt Amerikës Veriore janë mbi 50% dhe pritet të diskutojë personalisht me Infantinon gjatë fundjavës në Miami.
Sipas tij, një Botëror pa Italinë nuk ka kuptim dhe vendimi final mbetet në dorë të dyshes Trump-Infantino. Megjithatë, zyrtarë të lartë si Marco Rubio e kanë mohuar këtë mundësi vetëm pak ditë më parë, duke e lënë situatën në kufijtë e një debati të nxehtë diplomatik dhe sportiv.
