Hoxhallari e mbyll në Poloni, gati firma në Superiore

Klubi polak Polonia Varshavë ka nisur planifikimin për sezonin e ardhshëm, pavarësisht faktit se skuadra mbetet në garë për një vend në fazën “play-off”. 

Aktualisht ekipi renditet në vendin e shtatë dhe ka në dispozicion edhe tre raunde për të tentuar ngjitjen në elitën e futbollit polak. Paralelisht me objektivat sportive, drejtuesit po përgatisin një ristrukturim të organikës që pritet të sjellë largime të shumta gjatë verës. 

Në mesin e lojtarëve që parashikohet të mbyllin bashkëpunimin është edhe mbrojtësi shqiptar, Erjon Hoxhallari. Sipas raportimeve të fundit, lojtari pritet të largohet me parametër zero, pasi kontrata e tij aktuale përfundon në fund të muajit qershor. 

Deri më tani nuk ka pasur asnjë lëvizje zyrtare nga klubi për të rinovuar marrëveshjen me ish-lojtarin e Tiranës. Hoxhallari u transferua në Poloni në vitin 2024, duke fituar menjëherë një vend në formacionin bazë të skuadrës. 

Megjithatë, e ardhmja e tij mbetet e paqartë, me mundësinë për të qëndruar në kampionatin polak ose për t’u rikthyer në Shqipëri. 

Një rikthim te klubi i Tiranës shihet si një opsion i mundshëm, duke pasur parasysh të kaluarën e tij të suksesshme me bardheblutë.