Paris Saint-Germain dhe Arsenal do të përballen më 30 maj në Budapest në finalen e këtij sezoni të Champions League, në një sfidë që sjell përballë dy skuadra me objektiva dhe histori të ndryshme në futbollin europian. Përballja mes klubit francez dhe atij anglez konsiderohet një nga finales më interesante të viteve të fundit, jo vetëm për emrat në fushë, por edhe për rëndësinë historike që mbart.
Për herë të parë në historinë e Champions League, finalja do të luhet mes një skuadre franceze dhe një angleze. Po ashtu, kjo është hera e parë që dy trajnerë spanjollë do të drejtojnë skuadrat finaliste në ndeshjen më të rëndësishme të futbollit europian për klube. Në njërën pankinë do të jetë Luis Enrique, trajner me eksperiencë dhe fitues trofesh në arenën ndërkombëtare, ndërsa në anën tjetër Mikel Arteta, i cili ka ndërtuar një Arsenal konkurrues dhe shumë të organizuar.
PSG do të luajë finalen e tretë në historinë e saj dhe të dytën radhazi. Skuadra parisiene vjen në këtë sfidë si kampione në fuqi, pas suksesit të sezonit të kaluar ndaj Interit, triumf që i dha klubit trofeun e parë europian. Ndërkohë, Arsenal rikthehet në finalen e Champions League pas një mungese prej 20 vitesh. Londinezët kishin luajtur finalen e vetme në sezonin 2005-2006, kur u mposhtën nga Barcelona.
Skuadra angleze po zhvillon një sezon shumë të mirë edhe në Premier League, ku kryeson renditjen tre javë para fundit të kampionatit. Arsenal mbetet gjithashtu i pamposhtur në këtë edicion të Champions League, duke treguar stabilitet dhe vazhdimësi gjatë gjithë sezonit europian. Nga ana tjetër, PSG konsiderohet favorite për finalen e Budapestit. Skuadra franceze ka ruajtur bërthamën që fitoi trofeun sezonin e kaluar dhe eksperienca e Luis Enrique shihet si një element i rëndësishëm në menaxhimin e ndeshjeve të mëdha. Në gjysmëfinalen ndaj Bayern Munich, parisienët treguan kontroll të lojës dhe aftësi për të reaguar në momentet më të vështira të sfidës.
Në mesfushë, PSG mbështetet te organizimi dhe kontrolli i lojës nga Vitinha dhe João Neves, ndërsa eksperienca e Marquinhos dhe forca fizike e Pacho konsiderohen pika të rëndësishme në repartin defensiv. Në fazën sulmuese, skuadra franceze ka alternativa të shumta me Doué, Dembélé dhe Kvaratskhelia, lojtarë që mund të vendosin fatin e një ndeshjeje edhe me pak raste të krijuara. Finalet europiane kanë prodhuar shpesh rezultate të papritura dhe, edhe pse PSG hyn në fushë si favorite, Arsenal synon të shfrytëzojë momentin për të marrë trofeun më të lakmuar për klube.
