Mbrojtësi i majtë i Kombëtares Shqiptare, Mario Mitaj, është shumë pranë transferimit në Serinë A te skuadra e Romës.
Vlera e këtij operacioni në tregun e transferimeve pritet të kapë shifrën e rreth 10 milionë eurove. Gjithçka ka ecur me hapa të shpejtë, pasi trajneri Gian Piero Gasperini ka dhënë menjëherë dritën e gjelbër për afrimin e talentit kuqezi në organikën e tij.
Futbollisti 22-vjeçar pritet që përgjatë javës së ardhshme të kryejë vizitat mjekësore përpara nënshkrimit të kontratës së re. Për anësorin defensiv, i cili së fundmi ishte pjesë e klubit të Al-Ittihad në Arabinë Saudite, ka pasur një interesim të gjerë nga disa klube europiane.
Në garë për shërbimet e tij ishte rreshtuar edhe AEK-u i Athinës, por lojtari nuk e ka parë si opsion parësor rikthimin në kampionatin grek. Përmes kësaj lëvizjeje, drejtuesit e klubit italian synojnë të përforcojnë prapavijën me një element premtues për të ardhmen.
