Sulmuesi nigerian Peter Olayinka është aktualisht lojtar i lirë, pas ndërprerjes konsensuale të kontratës me klubin serb Crvena Zvezda në tetorin e kaluar.
30-vjeçari po vijon stërvitjen i diferencuar, pasi ka lënë pas një periudhë riaftësimi prej më shumë se 180 ditësh për shkak të një operacioni në tendinën e Akilit.
Olayinka, i cili ka shënuar mbi 100 gola dhe ka fituar 11 trofe gjatë karrierës së tij, mund të jetë një opsion për merkaton e janarit në kampionatin shqiptar.
Sipas “Superliga Fan Club” lojtari, i cili më parë përfitonte rreth 70 mijë euro në muaj, mund të pranonte një ofertë prej 25 mijë eurosh në muaj për një kontratë afatshkurtër deri në verë.
Sulmuesi ka aftësinë të mbulojë si qendrën e sulmit, ashtu edhe krahët, duke u parë si një përforcim i mundshëm për ekipet e kreut të renditjes.
Mbetet për t’u parë nëse ndonjë prej klubeve të Superiores do të bëjë përpjekjen financiare për të siguruar shërbimet e tij.
