Kastrioti bëri surprizën në javën e parë të Kategorisë së Parë. Skuadra krutane arriti të marrë një barazim 2-2 në transfertën ndaj Burrelit.
Ky rezultat konsiderohet i jashtëzakonshëm pasi klubi udhëtoi me vetëm 15 futbollistë në dispozicion dhe pa asnjë portier të dytë në stol.
Situata emergjente erdhi si pasojë e bllokimit të merkatos nga FIFA për shkak të detyrimeve financiare ndaj ish-lojtarëve. Megjithatë, drejtuesit e Kastriotit kanë bërë një hap të rëndësishëm për zgjidhjen e këtij problemi.
Nga tri çështjet pezull në FIFA, klubi ka shlyer tashmë detyrimet për një prej tyre, ndërsa pagesat e tjera pritet të mbyllen në ditët në vijim.
Tani mbetet për t’u parë se si do të procedohet me regjistrimin e lojtarëve të rinj, duke qenë se afati zyrtar i merkatos ka përfunduar.
