“Plas” keq te klubi shqiptar, drejtuesit futen në dhomat e zhveshjes. Lojtari refuzon të dalë në fushë

Humbja 0-3 e Ballkanit kundër Dukagjinit, në gjysmëfinalen e parë të Kupës së Kosovës, është shoqëruar me incidente të rënda brenda klubit nga Suhareka.

Sipas raportimeve nga “Kanal10”, gjatë pushimit mes pjesëve, drejtues të lartë të klubit kanë hyrë në dhomat e zhveshjes të irrituar me performancën e ekipit, duke nisur një debat të ashpër me disa nga futbollistët.

Situata është përshkallëzuar deri në prag të konfrontimit fizik, i cili raportohet se është parandaluar nga ndërhyrja e lojtarëve të tjerë të pranishëm.

Si pasojë e këtij tensioni, mbrojtësi Marsel Ismajlgeci, duke u ndjerë i fyer nga fjalori i përdorur, ka vendosur të largohet menjëherë nga zhveshtorja dhe ka refuzuar të luajë në pjesën e dytë.

Ballkani tashmë duhet të përmbysë rezultatin tre-golësh në ndeshjen e kthimit që do të luhet në Klinë më 22 prill, në një klimë tejet të rënduar brenda grupit.