Milani ka nisur një revolucion të plotë pas humbjes ndaj Cagliarit, rezultat i cili i kushtoi skuadrës kualifikimin në edicionin e ardhshëm të Champions League.
Gerry Cardinale, pronar i klubit ka marrë vendimin për të shkarkuar të gjithë stafin teknik dhe atë drejtues të kuqezinjve. Sipas mediave italiane, nga postet e tyre pritet të largohen administratori i deleguar Giorgio Furlani, drejtori sportiv Igli Tare, kreu i sektorit të skautizmit Geoffrey Moncada, si dhe trajneri Massimiliano Allegri.
Ky i fundit mbyll aventurën e tij pas vetëm një viti në pankinë, pasi klauzola për zgjatjen e kontratës deri në vitin 2028 nuk u aktivizua për shkak të mosarritjes së objektivit europian.
Për sa i përket zëvendësuesit të tij, mes emrave të përfolur janë Mark van Bommel, i cili pëlqehet nga Zlatan Ibrahimovic, dhe Vincenzo Italiano, ndërsa pista për një kalim të Antonio Contes mbetet e vështirë. Në orët e ardhshme pritet të vijë dhe zyrtarizimi nga klubi.
