Dragan Stojkoviç nuk është më trajner i Kombëtares së Serbisë.
Federata ka konfirmuar dorëheqjen e tij, e cila u paraqit menjëherë pas humbjes me Shqipërinë. Situata në kampin serb ka qenë e tensionuar, ndërsa edhe ndihmësi Goran Doroviç, bashkë me stafin teknik, janë larguar nga detyra.
Federata ka njoftuar se për ndeshjen e radhës në Andorra, skuadrën do ta drejtojë një staf i përkohshëm. Drejtimin e ekipit e merr për momentin Zoran Mirkoviç, trajneri aktual i Kombëtares U-21.
Ky vendim është marrë deri në përcaktimin e trajnerit të ri të përfaqësueses. Të premten e ardhshme është parashikuar një mbledhje e federatës për të vendosur mbi emrin përfundimtar. Deri tani, emri më i përfolur si pasues i Stojkoviç është ai i Veljko Paunoviç.
