E ardhmja e Silvinjos në krye të Kombëtares shqiptare ka hyrë në fazën finale. Tekniku brazilian ndodhet aktualisht në Tiranë, ku po zhvillon diskutime intensive me krerët e Federatës Shqiptare të Futbollit, ndërkohë që kontrata e tij aktuale skadon në korrik.
Report Tv bën me dije se trajneri e ka marrë tashmë vendimin e tij, i cili pritet të bëhet publik shumë shpejt.
Që pas eliminimit dramatik në fazën “play-off” të Botërorit, zërat për një largim të mundshëm të Silvinjos janë shtuar. Gjatë aventurës së tij 3-vjeçare e gjysmë, braziliani arriti suksese historike si kualifikimi në Euro 2024 dhe dërgimi i Shqipërisë për herë të parë në “play-off”-in e një Botërori.
Ditët e ardhshme do të përcaktojnë nëse cikli i Silvinjos do të vazhdojë apo nëse kuqezinjtë do të nisin një epokë të re.
