Klubi i Skënderbeut ka nisur menjëherë punën për ndërtimin e organikës që do të përfaqësojë skuadrën në elitën e futbollit shqiptar sezonin e ardhshëm.
Edhe pse pushimet kanë filluar për lojtarët, drejtuesit janë fokusuar te përcaktimi i trajnerit të ri, emër i cili pritet të zyrtarizohet së shpejti nga presidenca.
Paralelisht me çështjen e stolit, klubi po punon për rinovimin e kontratave me lojtarët titullarë të sezonit të fundit, duke filluar nga portieri Marko Alia.
Një pikë e rëndësishme e strategjisë është rikthimi i futbollistëve që ishin dhënë në huazim, ku spikasin sulmuesit Charles Bismark dhe Ardit Nikaj. Bismark do të lërë Vllazninë pas 30 qershorit, ndërsa Nikaj rikthehet nga kampionati polak për t’iu bashkuar sërish bardhekuqve.
LEXO EDHE: Skënderbeu firmos me titullarin për Superioren
Të dy lojtarët kanë kontrata me klubin korçar dhe shihen si përforcime të vlefshme për sulmin. Gjithashtu, në ambientet e juglindjes po diskutohet rikthimi i mundshëm i mesfushorit Dean Liço, i cili mbyll kontratën në Turqi në fund të këtij sezoni.
Liço shihet si një element cilësor që do të rriste konkurrencën në mesin e fushës. Drejtuesit synojnë të ndërtojnë një grup solid duke ndërthurur lojtarët aktualë me rikthimet e rëndësishme. Këto lëvizje tregojnë ambiciet e klubit për një prezantim dinjitoz në Superligë.
