Taulant Seferi po kalon një moment pozitiv në këtë start sezoni te skuadra e Kayserisporit.
Sulmuesi i Kombëtares shqiptare realizoi golin e tij të pestë me fanellën e ekipit të ri në Ligën e Parë turke.
Ky realizim erdhi në fitoren me shifrat e thella 3-0 në transfertë përballë Esenler Eroksporit. Sfida ishte e vlefshme për javën e gjashtë të kampionatit vendas.
29-vjeçari tundi rrjetën në minutën e 68-të falë një aksioni të bukur individual që vulosi triumfin e miqve. Me këtë gol, Seferi është ngjitur në vendin e katërt të listës së golashënuesve më të mirë të ligës.
Ndërkohë, ai ndodhet vetëm një gol prapa Rey Manaj dhe ish-sulmuesit të Manchester Cityt, Kelechi Iheanacho, të cilët udhëheqin me nga 6 gola.
