Presidenti i Vllaznisë, Alban Xhaferi, ka mësuar sot vendimin zyrtar të Komisionit të Disiplinës dhe Etikës pranë FSHF-së pas incidentit me arbitrin Ergys Spahiu.
Ndonëse u pezullua me 15 ndeshje për goditje ndaj zyrtarit, rregullorja i lë hapësirë kreut të klubit shkodran për reduktimin e këtij sanksioni. Në rast se nuk ka një pezullim të plotë të dënimit nga Apeli, Xhaferit i lind e drejta ligjore për ta shlyer gjysmën e dënimit me gjobë.
Komisioni nuk ia ka hequr të drejtën e aplikimit të Nenit 75 të KDE-së, siç kishte vepruar më parë në rastin e Flamurtarit. Për të shfrytëzuar këtë mundësi, numri një i shkodranëve do të duhet të paguajë një shumë prej 7 milionë lekësh të vjetra pas shlyerjes së gjysmës së ndeshjeve.
Nëse zbatohet ky skenar, ai mund të rikthehet në shkallët e stadiumit pas 8 ndeshjeve pezullim. Kështu, rikthimi i tij mund të bëhet pikërisht në javën e 11-të, kur Vllaznia të përballet me Elbasanin në stadiumin “Loro Boriçi” në fillim të muajit nëntor.
