Ousmane Dembele i ka shqetësuar të gjithë te Paris Saint-Germain, në prag të finales së Champions League kundër Arsenalit. Sulmuesi francez u zëvendësua para kohe në ndeshjen e fundit të kampionatit ndaj rivalëve të qytetit, Paris FC, duke shkaktuar shqetësim të madh te stafi teknik.
29-vjeçari u largua nga fusha duke çaluar pas një problemi në pulpën e këmbës së djathtë. Menjëherë pas ndeshjes, PSG konfirmoi se lojtari kishte ndier shqetësime muskulare dhe se për këtë arsye ishte vendosur të mos rrezikohej më tej. Klubi bëri të ditur se Dembele do t’i nënshtrohet një trajtimi specifik gjatë ditëve të ardhshme dhe do të monitorohet vazhdimisht nga stafi mjekësor.
Megjithatë, ekzaminimet e para kanë sjellë lajme pozitive për kampionët e Francës. Analizat kanë përjashtuar një dëmtim serioz apo një këputje muskulore, çka rrit ndjeshëm mundësitë që sulmuesi të rikuperohet në kohë për finalen europiane të planifikuar më 30 maj në Budapest.
Pas humbjes 2-1 në derbi, trajneri Luis Enrique u përpoq të ulte tensionin rreth gjendjes së lojtarit. Tekniku spanjoll deklaroi se zëvendësimi i Dembele me Gonçalo Ramos ishte një masë paraprake dhe jo pasojë e një problemi të rëndë fizik. Trajneri u shpreh se situata nuk duket alarmante dhe se mbeten ende dy javë deri në finalen e Champions League. Sipas tij, lodhja fizike mund të ketë qenë shkaku kryesor i shqetësimit të lojtarit.
Dembélé konsiderohet një nga elementët më të rëndësishëm të PSG-së këtë sezon. Sulmuesi francez ka regjistruar 19 gola dhe 11 asistime në 39 ndeshje në të gjitha kompeticionet, duke qenë një nga lojtarët më të spikatur të skuadrës.
Prania e tij në finalen ndaj Arsenalit shihet si thelbësore për objektivat e klubit francez, që synon të fitojë trofeun më të rëndësishëm europian për klube. Për këtë arsye, stafi mjekësor po tregohet shumë i kujdesshëm në menaxhimin e rikuperimit të tij.
Situata e Dembele po ndiqet me interes edhe nga kombëtarja franceze. Stafi teknik i Didier Deschamps po monitoron gjendjen e lojtarit në prag të përgatitjeve për Botërorin, ku sulmuesi konsiderohet një nga pikat kryesore të ekipit.
