E bujshme/ Klubi shqiptar rikthen kapitenin, gati firma edhe me Esat Malën

Klubi i Ballkanit ka nisur lëvizjet e para të rëndësishme në merkato për sezonin e ri, duke synuar rikthimin te trofetë e rëndësishëm në futbollin kosovar.

Skuadra nga Suhareka ka zyrtarizuar rikthimin e ish-kapitenit Edvin Kuç pas dy vitesh largim. Mesfushori shihet si një përforcim me peshë për repartin e mesfushës, duke qenë se ka udhëhequr ekipin në periudhën e tij më të lavdishme, ku fituan tre tituj kampionë radhazi dhe siguruan pjesëmarrjen historike në grupet e Ligës së Konferencës.

Përveç Kuç, drejtuesit e Ballkanit janë vënë në ndjekje edhe të mesfushorit Esat Mala, të cilit i kanë paraqitur një ofertë zyrtare.

Megjithatë, për të siguruar shërbimet e Malës, suharekasit duhet të mposhtin konkurrencën e Teutës së Durrësit, që nën drejtimin e Edlir Tetovës po ndërton gjithashtu një grup konkurrues për kampionatin shqiptar.