Saliu Sembene do të jetë përforcimi më i ri i Dinamos. Qendërmbrojtësi 24-vjeçar ishte pa ekip që prej largimit nga Partizani dhe nesër do t’i bashkohet zyrtarisht skuadrës në stërvitje.
Ky kalim te rivalët e kryeqytetit konsiderohet si një nga “tradhtitë” më të mëdha të merkatos në futbollin shqiptar.
Më parë, senegalezi kishte deklaruar se në Shqipëri do të luante vetëm për të kuqtë, por veshja e fanellës dinamovite në palestër doli të ishte më shumë se një sinjal. Sembene u rrit te Partizani ku qëndroi për 5 vite dhe zhvilloi gjithsej 111 ndeshje zyrtare.
Gjatë kësaj periudhe, ai arriti të fitojë edhe titullin kampion si dhe trofeun e Superkupës së Shqipërisë. Tashmë te Dinamo, futbollisti do të ribashkohet me trajnerin Ilir Daja, me të cilin ka punuar edhe gjatë kohës te të kuqtë.
