Klubi i Skënderbeut po vijon rregullisht fazën përgatitore për sezonin e ri, teksa tashmë është sqaruar edhe situata e lojtarit Saleh Nasr.
Mungesa e futbollistit egjiptian në seancat e para stërvitore kishte ngritur pikëpyetje mbi qëndrimin e tij në radhët e skuadrës bardhekuqe.
Megjithatë, drejtuesit e klubit kanë bërë të ditur se vonesa ka ardhur për shkak të procedurave administrative për pajisjen e tij me vizë. Gjithçka tashmë është zgjidhur dhe lojtari ka siguruar dokumentacionin e nevojshëm ligjor për të udhëtuar drejt Shqipërisë.
Nasr pritet të mbërrijë në Korçë brenda pak ditësh për t’u vendosur menjëherë nën urdhrat e stafit teknik. Ai do të integrohet në grup për të nisur përgatitjet intensive me pjesën tjetër të lojtarëve që po stërviten rregullisht.
Ndërkohë, menaxhmenti i Skënderbeut po monitoron tregun për të realizuar ndërhyrje të tjera të mundshme në merkaton e verës.
