Klubi i Skënderbeut po vijon me intensitet planifikimin e organikës për edicionin e ri futbollistik, duke marrë vendime të rëndësishme si për hyrjet, ashtu edhe për lojtarët që nuk do të jenë pjesë e planeve.
Së fundmi, drejtuesit korçarë kanë refuzuar kërkesën e një ish-futbollisti të tyre që kishte shfaqur dëshirën për t’u rikthyer në skuadër.
Bëhet fjalë për anësorin e sulmit, Tayon, i cili më herët kishte një aventurë të shkurtër gjashtëmujore me klubin përpara se të huazohej te Kukësi. Pasi mbylli periudhën e huazimit në radhët e verilindorëve, sulmuesi tentoi të vishte sërish fanellën bardhekuqe për sezonin e ri.
Megjithatë, stafi teknik dhe drejtuesit e klubit kanë dhënë një përgjigje negative, duke mos e llogaritur atë në projektin e ri teknik.
