Igli Tare mund të nisë një aventurë të re në Arabinë Saudite, pas eksperiencës te Milani, e cila u mbyll para kohe dhe pa rezultatet që priteshin. Ish-drejtori sportiv i Lazios, emri i të cilit është përfolur në disa klube italiane, tashmë ka hyrë në negociata për të marrë një post drejtues tek Al Ahly.
Sipas gazetarit italian Francesco Porzio, drejtuesit e klubit saudit kanë nisur bisedimet me Taren për t’i besuar postin e drejtorit sportiv.
Al Ahly kërkon të shfrytëzojë eksperiencën e shqiptarit në futbollin italian, veçanërisht aftësinë e tij për të identifikuar dhe afruar futbollistë cilësorë në merkato.
Por negociatat kanë edhe një element që ka tërhequr vëmendjen. Vetë Porzio e ka përshkruar Taren si një drejtues me të cilin është “e vështirë të punohet”, për shkak të karakterit strikt dhe mënyrës së tij të drejtimit.
Megjithatë, kjo nuk i ka penguar drejtuesit e Al Ahly të vazhdojnë kontaktet me shqiptarin. Klubi kërkon të plotësojë vendin që mbeti bosh pas largimit të portugezit Rui Pedro në shtator.
Për momentin, palët nuk kanë njoftuar ndonjë marrëveshje përfundimtare. Nëse negociatat konkretizohen, Tare do të largohet nga futbolli italian ku ka drejtuar për shumë vite për të marrë drejtimin sportiv të një klubi në Arabinë Saudite.
