Serbi-Shqipëri/ Bastet i “japin” fitoren vendasve, si kuotohet dueli

Në prag të sfidës Serbi–Shqipëri që do të zhvillohet mbrëmjen e sotme në Leskovac, kompanitë e basteve kanë përcaktuar si favoritë vendasit. 

Koeficientët tregojnë epërsinë e serbëve, të cilët kuotohen me 1.70 për fitore. Një barazim mes dy skuadrave vlerësohet me 3.40, ndërsa suksesi i mundshëm i Kombëtares shqiptare ka kuotën 5.75. 

Megjithatë, rezultati përfundimtar do të vendoset vetëm në fushë, ku Silvinjo dhe skuadra e tij synojnë të marrin tre pikët. Përballja pritet të ketë rëndësi të veçantë për ecurinë në grup dhe objektivin e kualifikimit.

Aktualisht Shqipëria renditet në vendin e dytë me 8 pikë pas 5 ndeshjeve, ndërsa Serbia ndodhet pas saj me 7 pikë dhe një takim më pak. 

Në krye të grupit qëndron Anglia me 15 pikë, ndërsa Letonia dhe Andorra mbyllin renditjen me 2 dhe 0 pikë.