Ish-trajneri i Shqipërisë, Silvinjo, ka bërë një reagim pas largimit nga drejtimi i skuadrës kuqezi.
Braziliani mbylli një periudhë mbi trevjeçare në krye të pankinës kuqezi, duke ia dorëzuar detyrën italianit Rolando Maran. Përmes një postimi në rrjetet sociale, ai ka shpërndarë një material video që pasqyron rrugëtimin e tij gjatë kësaj periudhe.
Në mesazhin e tij, ish-tekniku ka shprehur mirënjohje për mikpritjen e marrë dhe ka vlerësuar punën e bërë për rritjen e ekipit. Ai ka falënderuar specifikisht presidentin e FSHF-së, Armand Duka, stafin administrativ, bashkëpunëtorët e tij teknikë dhe lojtarët.
POSTIMI:
Së bashku, përfunduam një kapitull të mrekullueshëm pune. Gjatë gati tre viteve e gjysmë, punuam jashtëzakonisht shumë për të përfaqësuar këtë vend që më priti kaq ngrohtësisht.
Besoj se kemi bërë përparim të konsiderueshëm me Kombëtaren shqiptare dhe jam shumë mirënjohës ndaj Presidentit, stafit të federatës, stafit të trajnerëve, të gjithë lojtarëve që ishin me ne gjatë gjithë këtij udhëtimi dhe mbështetësve të zjarrtë të ekipit kombëtar.
Që nga dita e parë, premtuam se nuk do të mungonte shpirti, zemra dhe puna e palodhur.
U uroj të gjithëve suksese të mëdha në të ardhmen dhe do të vazhdoj t’ju mbështes kudo që të jem. Faleminderit shumë nga thellësia e zemrës sime.
