Mbrojtësi i Egnatias, Eljon Sota, rezultoi i pafat në ndeshjen kundër Teutës, e fituar 1 – 0 kundër rrogozhinasve. Në minutën e 56-të, 28-vjeçari u largua nga fusha e blertë me barelë, dëmtim i rëndë, ku përflitej për mbylljen e sezonit.
Zyrtari i Egnatias, Xhevdet Zekaj, ka treguar prapaskenën, teksa ekipet ishin drejtuar në dhomat e zhveshjes, pas ndeshjes Egnatia – Teuta (1 – 0), ku presidenti i klubit durrsak, Fatos Troplini, shkoi për t’i uruar shërim të shpejtë mbrojtësit Sota.
“Futbolli bashkon, rivaliteti mbetet në fushë! Në korridor të Arena Egnatias, pas ndeshjes Egnatia–Teuta, më afrohet presidenti i Teutës, Fatos Troplini, me buzëqeshjen e tij karakteristike dhe më thotë:
‘Duhet të shkojmë deri te sportistët e Egnatias për të takuar Elion Sotën. Dua t’i uroj shërim nga afër!’
Një fjali e thjeshtë, por me shumë kuptim. Së bashku u nisëm për ta takuar Sotën, por drejtori Klejdi Zenelaj i shpjegon se ishte larguar tashmë. Dhe z. Fatos merr informacion të plotë dhe largohet.
Ky ishte një gjest human, qytetar dhe institucional, që meriton të vlerësohet si nga presidenti Troplini, drejtuesit e Teutës dhe në veçanti trajneri Braja, lojtarët e Teutës të trishtuar, por edhe nga kultura, infrastruktura që ofron KF Egnatia me kolegët dhe rivalët.
Sepse futbolli nuk është vetëm rezultat, pikë, rivalitet apo interes, por është respekt, qytetari, kujdes për njëri-tjetrin dhe mesazhe paqeje, është aftësia për të ndier dhimbjen e tjetrit, edhe kur ai mban një fanellë tjetër.
Mirënjohje presidentit Fatos Troplini dhe gjithë familjes së Teutës për këtë gjest!
Elion Sota, shërim të shpejtë! Të rikthehesh sa më parë në fushë, më i fortë, më i shëndetshëm dhe më i gatshëm për të dhënë kontributin tënd për Egnatian, ashtu siç ke bërë gjithmonë!
Ky është futbolli që duam, ky është sporti që na bashkon! Ky mesazh plot vlera qytetarie për futbollin e shoqërinë tonë!”, postimi i Xhevdet Zekajt.
