Kombëtarja e Gambias ka publikuar listën paraprake të futbollistëve të grumbulluar për dy përballjet e rëndësishme të muajit shtator.
Surpriza kryesore mes emrave të ftuar është mbrojtësi i Tiranës, Joseph Colley, i cili merr një ftesë të tillë për herë të parë në karrierën e tij. 27-vjeçari ka luajtur më parë me ekipet e moshave të Suedisë pas transferimit të tij që në moshë të re në shtetin skandinav.
Mbrojtësi shtatlartë nuk është aktivizuar kurrë më parë në kampionatin e vendlindjes së tij. Sa i përket aventurës në Superiore, qendërmbrojtësi ka zënë menjëherë një vend si titullar fushë te skuadra e Tiranës.
Risia e ftesës së tij vjen pikërisht përpara sfidave që Gambia do të zhvillojë kundër Somalisë dhe Ganës. Këto përballje shënojnë edhe startin e fazës kualifikuese për Kupën e Kombeve të Afrikës, ku në grup bën pjesë edhe Bregu i Fildishtë.
