Kukësi përgatitet të nisë kampionatin në Kategorinë e Parë me synime të qarta dhe mbështetje të madhe financiare.
Presidenca e klubit verilindor ka vendosur shpërblime të larta për lojtarët përpara sfidës së parë ndaj Besëlidhjes.
Konkretisht, ekipi do të përfitojë 10 mijë euro premio sa herë që arrin të grumbullojë të paktën 9 pikë në 4 ndeshje radhazi. Kjo skemë shpërblimi do të mbetet e vlefshme përgjatë të gjithë sezonit futbollistik.
Përveç bonusit për ecurinë në kampionat, drejtuesit kanë akorduar edhe një premio madhore prej 100 mijë eurosh në rast rikthimi në Superiore.
Verilindorët u larguan nga elita dy vite më parë dhe tashmë kërkojnë të ringrenë një nga emrat me më shumë histori në vend. Me këtë lëvizje, Kukësi konfirmon pretendimet e tij serioze për të qenë protagonist absolut në këtë edicion.
