Kastrioti po kalon një situatë kritike para startit të edicionit të ri në Kategorinë e Parë.
Skuadra krutane numëron vetëm 13 lojtarë të regjistruar zyrtarisht në organikë deri më tani. Shkak për këtë ngërç janë bërë dy çështje të mbetura pezull në FIFA, të cilat kanë bllokuar merkaton e klubit prej kohësh.
Të gjithë futbollistët e disponueshëm janë pjesë e organikës nga sezoni i kaluar, mes të cilëve vetëm një portier i deklaruar. Sfida e javës së parë përballë Burrelit do të zhvillohet këtë të dielë, më 6 shtator.
Nëse drejtuesit nuk arrijnë të zgjidhin bllokimin në kohë, ekipi nuk do të ketë mundësi të federojë afrime të tjera. Në këtë skenar, Kastrioti mund të federojë vetëm lojtarë pa kontratë pas datës 1 shtator, duke ndjekur rrugëtimin me probleme që pësuan më parë edhe Tirana e Skënderbeu.
