Tek Interi janë vënë në lëvizje për të mbrojtur një nga shtyllat e krahut të djathtë, Denzel Dumfries. Pas një sezoni ku mungesa e tij u ndje ndjeshëm, rikthimi i holandezit në fushë rezultoi vendimtar për shkëputjen e Interit drejt titullit kampion, siç u dëshmua edhe me dopietën e tij ndaj Comos.
Megjithatë, ajo që po shqetëson ambientin zikaltër është klauzola e largimit prej vetëm 25 milionë eurosh. Kjo shifër konsiderohet tejet e ulët për një lojtar të nivelit të tij, i cili ka treguar se mund të vendosë ndeshje të rëndësishme në Ligën e Kampioneve dhe të garantojë gola me peshë çdo sezon.
Dyshimet mbeten mbi afatin e saktë të ushtrimit të kësaj klauzole, e cila mendohet se mund të aktivizohet gjatë muajit korrik. Drejtuesit e Interit po punojnë për të evituar një largim të papritur që do të linte një boshllëk të madh në formacionin e Chivut.
