Pavarësisht se Paris Saint-Germain siguroi finalen e Champions League pas barazimit 1-1 me Bayern Munich, e gjithë vëmendja është zhvendosur te gjykimi i portugezit João Pinheiro. Ndeshja e kthimit në “Allianz Arena” u shoqërua me vendime që kanë tërbuar kampin gjerman. Arbitri Pinheiro injoroi tre raste të dyshimta për prekje të topit me dorë, dy prej të cilave brenda zonës së parisienëve, si dhe fali mbrojtësin Nuno Mendes nga një karton i kuq i mundshëm që në pjesën e parë, vendime këto që mund të kishin përmbysur fatin e kualifikimit.
Por duket se kjo performancë nuk do të kalojë në heshtje. Raportohet se menjëherë pas vërshëllimës finale, zyrtarë të lartë kanë kontaktuar zyrën e presidentit të UEFA-s, Aleksander Čeferin, për të denoncuar parregullsitë. Institucioni më i lartë i futbollit europian ka nisur zyrtarisht hetimet ndaj João Pinheiro-s. Akuzat bëhen edhe më të rënda nga dëshmitë e fundit që tregojnë për një takim sekret mes arbitrit portugez dhe presidentit të PSG-së, Nasser Al-Khelaifi, përpara nisjes së sfidës.
Ndërsa PSG feston arritjen e finales kundër Arsenal-it, kjo hije skandali ka ngritur dyshime mbi suksesin e tyre. Mediat gjermane po ushtrojnë presion të madh për zbardhjen e së vërtetës. Nëse hetimet vërtetojnë një marrëveshje të fshehtë apo ndikim të jashtëm, pasojat për gjyqtarin Pinheiro dhe vetë klubin parisien mund të jenë të rënda.
