Barcelona ka njoftuar zyrtarisht se ndeshja e raundit të dytë të Champions League ndaj Paris Saint-Germain do të zhvillohet në stadiumin “Montjuic”.
Klubi katalanas ende nuk ka marrë dritën jeshile nga UEFA për përdorimin e “Spotify Camp Nou”, i cili është në proces rinovimi. Arsyeja kryesore lidhet me mungesën e lejes së sigurisë që kërkohet për ndeshjet ndërkombëtare.
Për pasojë, përballja e 1 tetorit ndaj kampionëve të Europës do të luhet në stadiumin olimpik të Barcelonës. Sipas mediave spanjolle, edhe ndeshja e kampionatit të 28 shtatorit ndaj Real Sociedad do të zhvillohet në të njëjtin impiant, pasi La Liga përdor kritere të tjera, por situata mbetet e njëjtë.
Barcelona kishte shpresuar se pas fitores ndaj Newcastle në Angli, kthimi në “Camp Nou” do të ndodhte më herët. Megjithatë, rikthimi në stadiumin e tyre tradicional do të duhet të presë edhe disa muaj, ndërsa klubi vazhdon të punojë për të marrë të gjitha lejet e nevojshme.
/Cna
