E ardhmja e Enis Rexhepit vazhdon të jetë e pasigurt nëse do të luajë me Kombëtaren e Shqipërisë apo përfaqësuesen e Kosovës. Në bazë të informacionit ekskluziv që vjen nga “Telegrafi”, presidenti i Federatës së Futbollit të Kosovës, Agim Ademi, së fundmi ka qenë në Stuttgart të Gjermanisë dhe është takuar me talentin shqiptar, ndërsa bisedimet kanë qenë pozitive.
Jo vetëm kaq, por Rexhepi po mendon seriozisht të kalojë te “Dardanët”. Deri tani, qendërsulmuesi bën pjesë te Shqipëria U19, por në ndeshjet e fundit, nuk e pranoi ftesën për t’u bashkuar me kuqezinjtë.
Vlen të përmendet se në media po qarkullon informacioni se babai i Enis Rexhepit është pro që lojtari të luajë për Shqipërinë, megjithatë dëshira e 18-vjeçarit po korrespondon me lëvizjen te Kosova.
Rexhepi konsiderohet një nga talentet më të mëdhenj shqiptarë në fazën ofensive, ndërsa këtë edicion numëron 15 gola dhe 2 asiste në 16 paraqitje, statistika që nuk lënë vend për dyshim.
