“Asist” nga UEFA për Shqipërinë dhe Kosovën, gati ndryshimi historik. E konfirmon Ceferin

UEFA po shqyrton ndryshimin e formatit të kualifikueseve për Europian dhe Botëror. Ideja është që sistemi aktual i grupeve të zëvendësohet me një format të ngjashëm me atë të Champions League, me një tabelë unike dhe kundërshtarë të përcaktuar nga një algoritëm.

Lajmin e ka publikuar “Sport Bild”, ndërsa presidenti i UEFA-s, Aleksander Ceferin, e ka konfirmuar se po analizohet mundësia për ta bërë procesin më interesant dhe më pak të parashikueshëm.

Kjo do të ishte një mundësi e shkëlqyer për kombëtare si Shqipëria dhe Kosova, pasi kualifikimi në Europian apo Botëror do të bëhej më i lehtë.

Propozimi u ngrit nga një përfaqësues anglez gjatë një takimi në Malaga dhe mund të zbatohet pas Euro 2028, duke filluar me eliminatoret e Kupës së Botës 2030.

Një grup pune i Komisionit të UEFA-s për garat e ekipeve kombëtare po shqyrton të gjitha opsionet dhe do t’i paraqesë propozimet përfundimtare në Komitetin Ekzekutiv më 3 dhjetor. Nëse miratohet, ky ndryshim do të përfshijë si kualifikueset e Europianit, ashtu edhe ato të Botërorit.