Një epokë e re ka nisur zyrtarisht te Partizani B me prezantimin e trajnerit dhe stafit të ri teknik.
Klubi i kuq ka zyrtarizuar emërimin e Alfred Deliallisit në krye të pankinës për sezonin e ri në Kategorinë e Dytë. Tekniku vendosi të mbyllë aventurën e tij me Korabin në Kategorinë e Parë për të marrë drejtimin e ekipit të dytë të kryeqytetasve.
Më herët gjatë karrierës së tij, Deliallisi ka drejtuar edhe skuadrën e Erzenit në elitën e futbollit shqiptar. Përveç trajnerit kryesor, drejtuesit e kuq kanë zbuluar edhe emrat e bashkëpunëtorëve të tij në këtë projekt.
Roli i zëvendëstrajnerit i është besuar Ermal Serjanit, ndërsa Besnik Malaj do të jetë trajneri i ri i portierëve.
Përgatitja fizike e futbollistëve i është besuar Marlind Manushit, duke kompletuar kështu stafin teknik që do të udhëheqë skuadrën.
