Elbasani triumfoi 2-1 ndaj Partizanit në fund me përmbysje, në duelin e javës së nëntë në Abissnet Superiore.
Të kuqtë e nisën ndeshjen shumë mirë, duke kaluar në avantazh me Jovicic, i cili shënoi në debutim. Pjesa e parë u mbyll me këtë rezultat, ndërsa e dyta ishte tjetër histori.
Mazari barazoi shifrat në minutën e 82-të, ndërsa gjashtë minuta më vonë, Nikaj përmbysi shifrat. Goli i avantazhit për Elbasanin, u rishikua në VAR dhe më pas u pranua si i rregullt.
Me këtë sukses, Elbasani ngjitet në vendin e gjashtë me 11 pikë. Partizani thellon krizën dhe mbetet në fund me vetëm katër pikë.
Në duelin tjetër, Skënderbeu dhe Laçi ndanë nga një pikë mes tyre, pas barazimit 1-1 në Korçë.
Juglindorët e mbyllën pjesën e parë në avantazh, pas golit të shënuar nga Lagonydis. Për kurbinasit barazoi Traore në minutën e 66-të.
Para golit, kurbinasit ishin të pafat pasi në dy raste u ndalën nga shtylla.
Me këtë barazim, Skënderbeu mban vendin e tetë me 10 pikë, ndërsa Laçi me një pikë më shumë mban vendin e pestë.
