Gazetari Gjergji Stefa ka treguar një nga prapaskenat më interesante të futbollit shqiptar. Stefa ka treguar historinë e presidentit të Egnatias, Agim Demrozi, i cili para se të merrte rrogozhinasit, ka qenë i interesuar për Besën e Kavajës dhe Shkumbinin e Peqinit.
“Historia e presidentit të Egnatias, Takajt dhe Laskës, janë histori për film. Presidenti Demrozi kthehet nga Italia dhe fillimisht i bie derës së Kavajës, së Nexhat Bizhdilit dhe i thotë ‘hajde bëjmë Kavajën e madhe’. Nexhati me ato të vetat, ‘jo, jo’. Iku. Shkoi në Peqin dhe flet me drejtuesit e Bashkisë së Peqinit.
Dhe u thotë ‘meqë jam i zonës ta rikthejmë futbollin e Peqinit, ta bëjmë të madh’. I kërkojnë disa lekë për t’u bërë president. Një njeri që punon në Bashki, i kërkon lekë për t’i dhënë klubin. Shkojnë dhe i hapin derën në Rrogozhinë pastaj. Në vitin e parë në Rrogozhinë kishte një fushë dhe një mur. Në harkun e 4-5 viteve tha do ta bëj Egnatian evropiane. Si mos të qeshje ti, kishe gjithë këta të tjerët.
Murin e bëri shkallë stadiumi, i bëri strehën, vendosi stolat, bëri fushën, vuri rrjetën. Ky ka 3 gjëra ndryshe, futbolli për të nuk është emocion, është biznes. Që në vitin e parë ka dalë me 6 mijë euro fitim, kur po binte nga kategoria”, tha Stefa në Megasport.
