Hysaj refuzon 500 mijë euro nga klubi i Superiores, i del emri në Premier League-n angleze 

Ish-futbollisti Ditmar Bicaj ka zbuluar se mbrojtësi i Kombëtares Shqiptare, Elseid Hysaj, ka refuzuar një ofertë prej 500 mijë eurosh nga një klub në kampionatin shqiptar. 

Kjo pagë konsiderohet një shifër e padëgjuar më parë në futbollin vendës, por që në fund nuk u konkretizua. Objektivi kryesor i mbrojtësit kuqezi mbetet që të vazhdojë karrierën në nivelet më të larta të futbollit evropian. 

Në lidhje me të ardhmen e tij, media e njohur “Sport Witness” i ka kushtuar një artikull 32-vjeçarit duke ia sugjeruar si opsion klubit të Evertonit në Premier League. 

Skuadra angleze po kërkon me ngulm përforcime në krahët e mbrojtjes pas mbylljes së merkatos zyrtare. Duke qenë se afati i transferimeve ka përfunduar, Evertoni mund të nënshkruajë vetëm me lojtarë që janë aktualisht pa kontratë. 

Hysaj mbetet ende pa ekip pas përfundimit të aventurës së tij me Napolin në Serie A.