Elseid Hysaj vazhdon të jetë pa ekip që prej përfundimit të kontratës me Lazion në fund të sezonit të kaluar.
Mbrojtësi i Kombëtares shqiptare mbetet në kërkim të një aventure të re, pasi së fundmi ka refuzuar një tjetër mundësi.
Mediat italiane raportuan për negociata mes lojtarit dhe klubit të Ascolit që militon në Serie B. Diskutimet mes palëve për një kontratë dyvjeçare kishin ngecur në detajet financiare të marrëveshjes. Tashmë është konfirmuar se Hysaj i ka thënë përfundimisht “jo” ofertës së klubit italian.
Pas këtij refuzimi, Ascoli ka kthyer sytë nga mbrojtësi Lorenzo Venuti për të plotësuar atë pozicion. Kësisoj, anësori kuqezi mbetet pa skuadër dhe po shqyrton me kujdes hapat e ardhshëm të karrierës së tij.
Opsioni i një transferimi në Lindjen e Mesme duket gjithnjë e më i mundshëm për të ardhmen e futbollistit.
