Ish-futbollisti dhe trajneri i njohur Ditmar Bicaj është në bisedime për të marrë drejtimin e Vushtrrisë.
Skuadra që garon në elitën e futbollit kosovar kërkon një teknik të ri për të dalë nga situata e vështirë. Vetë Bicaj e ka konfirmuar interesimin gjatë emisionit “Mega Sport”, duke deklaruar se ka pasur kontakte mes palëve.
Vushtrria po kalon një moment mjaft kritik pasi ka pësuar gjashtë humbje në gjashtë ndeshjet e para. Skuadra kosovare ka pësuar 17 gola dhe ka arritur të realizojë vetëm 2 të tillë deri më tani.
Nga ana tjetër, Bicaj vjen pas përvojave pozitive në Shqipëri ku shkëlqeu te Burreli duke e çuar në fazën “Play-Off” dhe në vendin e katërt.
Ndërkohë, edhe gjatë periudhës që drejtoi Lushnjën edicionin e kaluar, tekniku pati paraqitje pozitive në stol.
