ZYRTARE/ Konfirmohet lajmi i “Vetëm Sport”! Tirana largon Bordin dhe zgjedh trajnerin e ri

Siç kishte paralajmëruar edhe “Vetëm Sport”, Tirana ka bërë ndryshime në stol.

Roberto Bordin nuk është më trajner i Tiranës. Palët janë ndarë mes tyre, pas humbjes me Elbasanin.

Njoftimi është dhënë nga vetë klubi bardheblu, që ka falënderuar teknikun italian nëpërmjet rrjeteve sociale.

Te Tirana nuk kanë humbur kohë dhe kanë gati trajnerin e ri. Drejtimi i është besuar Ardian Nuhiut, i cili pak javë më parë u largua nga drejtimi i Gjilanit në Kosovë.

Tirana e ka nisur sezonin me vështirësi të mëdha. Pas nëntë javëve të para, kryeqytetasit mbajnë vendin e parafundit në renditje, me vetëm gjashtë pikë të grumbulluara.

Bordin është trajneri i dytë i larguar nga Tirana në këtë fillim sezoni, pas Vangjel Miles.