Humbja ndaj Monacos dhe barazimet në dy javët e para, nuk kanë lëkundur aspak pozitat e Luis Enrique në krye të PSG-së.
Tekniku spanjoll do të vijojë të jetë në krye të francezëve edhe për disa vite të tjera, pasi ka marrëveshjen për një kontratë të re me kampionët në fuqi të Evropës, e cila do ta mbajë në Paris deri në vitin 2030.
Kontrata e mëparshme e 56-vjeçarit skadonte në fund të këtij sezoni, por drejtuesit e klubit kanë vendosur të vijojnë bashkëpunimin me teknikun që ka udhëhequr PSG-në drejt sukseseve të mëdha në arenën ndërkombëtare.
Rinovimi u zyrtarizua përpara ndeshjes ndaj Monacos në “Parc des Princes”. Përveç Luis Enrique, PSG ka njoftuar edhe rinovimin e kontratave të Joao Neves, Fabian Ruiz, Willian Pacho, Lucas Beraldo dhe Senny Mayulu. Festa e rinovimeve u zbeh nga rezultati në fushë. PSG u mposht 2-1 nga Monaco, duke mbetur ende pa fitore në tre ndeshjet e para të sezonit të ri në Ligue 1.
Luis Enrique mori drejtimin e PSG-së në verën e vitit 2023, pasi zëvendësoi Christophe Galtier. Objektivi kryesor ishte fitimi i shumëkërkuar i Ligës së Kampionëve dhe spanjolli ia doli ta realizojë. Në vitin 2025, PSG triumfoi në finalen e Champions League me një fitore spektakolare 5-0 ndaj Interit, ndërsa më pas mbrojti trofeun duke mposhtur Arsenalin me penallti në maj.
Gjatë periudhës së Luis Enrique në stol, PSG ka fituar gjithashtu tre tituj të Ligue 1 dhe dy Kupa të Francës. Sa i përket lojtarëve, Fabian Ruiz ka firmosur deri në fund të sezonit të ardhshëm, me një vit shtesë opsional. Ndërsa Joao Neves, Lucas Beraldo, Willian Pacho dhe Senny Mayulu kanë zgjatur kontratat e tyre deri në vitin 2031. PSG duket kështu se po ndërton një projekt afatgjatë, me Luis Enrique në qendër dhe një grup lojtarësh që pritet të përbëjnë boshtin e skuadrës edhe në vitet e ardhshme.
