Fluturimi i linjës “Air Albania” nga Tirana drejt Stambollit, i planifikuar të nisej sot në orën 18:20, u anulua papritur dhe pa asnjë sqarim zyrtar, duke krijuar pasiguri dhe pakënaqësi te pasagjerët.
Ndër udhëtarët e prekur ishte edhe Kombëtarja shqiptare e futbollit për vajza, e cila kishte planifikuar të udhëtonte drejt Turqisë për dy ndeshjet miqësore të datave 28 nëntor dhe 1 dhjetor.
Anulimi i pashpjeguar ndikoi drejtpërdrejt në programin sportiv, duke detyruar ekipin përfaqësues dhe stafin teknik të rikthehen, pasi mbetën për orë të tëra në pritje pa asnjë njoftim apo zgjidhje alternative.
Zyra e “Air Albania”-s në aeroport rezultoi e mbyllur, ndërsa numrat e kontaktit të kompanisë nuk funksiononin, duke e lënë situatën pa kanale komunikimi.
Paqartësia e krijuar vë në rrezik edhe zhvillimin e miqësoreve të planifikuara, duke ndikuar në organizimin e bërë më herët nga Federata Turke e Futbollit.
Ky rast përbën një situatë të padëshiruar për një ekip kombëtar që përfaqëson vendin në arenën ndërkombëtare dhe nxjerr në pah probleme në menaxhimin e situatave nga kompania ajrore.
Përveç ekipit kombëtar, dhjetëra pasagjerë të tjerë mbetën të bllokuar në aeroport pa informacion dhe pa zgjidhje të menjëhershme për udhëtimin e tyre.
Anulimi i fluturimit pa shpjegime dhe pa ofrimin e opsioneve alternative ngre pikëpyetje mbi funksionimin dhe përgjegjësinë e “Air Albania” ndaj pasagjerëve.
