Tirana është “boshatisur” më pauzën e kombëtareve. Bardheblutë numërojnë katër titullarë të ftuar nga kombëtaret, çka ndërlikon përgatitjet e trajnerit Dean Klafuriç për derbin ndaj Partizanit.
Bëhet fjalë për Visar Bekajn, Basilio Ndong, Xhozef Kollejn dhe Bojan Ilievskin. Mbrojtësi Kollej është grumbulluar për herë të parë nga Gambia, pasi më parë ka luajtur për moshat e Suedisë.
Portieri Bekaj ka marrë ftesën e zakonshme nga Kosova, ndërsa Ilievski rikthehet te Maqedonia e Veriut pas një viti mungesë. Anësori Ndong do të jetë i angazhuar me Guinenë Ekuatoriale gjatë kësaj periudhe.
Kollej dhe Ndong do të humbasin vetëm stërvitjet e këtij muaji dhe do t’i bashkohen ekipit në fillim të tetorit. Ndërkohë, Bekaj dhe Ilievski do të qëndrojnë me përfaqësueset e tyre deri pak ditë përpara përballjes derbi.
