Klodian Duro nuk do të jetë trajneri i ri i Besëlidhjes, siç u përfol së fundmi, raporton Panorama Sport. Nga klubi lezhjan konfirmojnë se emri i teknikut të ri do të vendoset gjatë javës së ardhshme, ndërsa ende nuk është vendosur për trajnerin.
Duro ishte për herë të fundit në krye të Lirisë së Prizrenit në Kosovë gjatë vitit të kaluar. Nga ana tjetër, Besëlidhja vendosi të ndante rrugët me trajnerin Elvis Plori pas dy humbjeve në ndeshjet e para.
Pas barazimit të marrë ndaj Bylisit, skuadra lezhjane i ka rikthyer sytë nga sfida e radhës në kampionat. Të shtunën më 20 shtator, lezhjanët do të presin në shtëpi ekipin e Besës në orën 13:30.
Klubi ka synim të qartë ngjitjen në Superiore për edicionin e ardhshëm. Aktualisht, Besëlidhja numëron vetëm 1 pikë të grumbulluar pas tri javësh lojë.
