Pritja për emrin e trajnerit të ri të Vllaznisë duket se ka marrë fund dhe zyrtarizimi pritet të bëhet në ditët në vijim. Mësohet se presidenti Alban Xhaferi ka zgjedhur teknikun hungarez Csaba Laszlo.
Me këtë lëvizje merr fund zyrtarisht epoka e trajnerit Edi Martini në stolin e skuadrës shkodrane.
Laszlo është një emër me përvojë të madhe 35-vjeçare në futbollin ndërkombëtar, pasi më parë ka drejtuar klube të njohura si Ferencváros, Hearts dhe Dundee United.
Përveç përvojës me klubet, 62-vjeçari ka qenë gjithashtu trajner i kombëtareve të Lituanisë e Ugandës si dhe ndihmës i Lothar Matthaus te Hungaria. Tekniku hungarez raportohet se ka arritur dakordësinë e plotë me numrin një të klubit kuqeblu për marrjen e drejtimit të ekipit.
Prezantimi i tij zyrtar pritet të bëhet këtë fundjavë përpara tifozëve dhe madiave. Menjëherë pas prezantimit, Laszlo do të nisë punën në fushë për të përgatitur Vllazninë për sfidën e radhës në kampionat ndaj Dinamos.
