Flamurtari mori fitoren e parë në Superiore. Vlonjatët triumfuan minimalisht ndaj Vllaznisë, në duelin e vlefshëm për javën e nëntë.
Sfida nisi e bukur dhe me raste në të dyja portat. Trashki kërkoi penallti në minutën e 7-të, pas një rrëzimi në zonë, ndërsa Vllaznia reagoi me Kastratin në minutën e 13-të, gjuajtja e të cilit nuk kishte saktësinë e duhur.
Në minutën e 40-të, portieri i Flamurtarit i mohoi avantazhin Kallakut me një pritje vendimtare. Bolzan kishte tre raste të mira para mbylljes së pjesës së parë për vlonjatët, por nuk shënoi dot.
Fraksioni i dytë nisi me bregdetarët më kërkues. Pohls me dy pritje vendimtare, u mohoi avantazhin vendasve.
Në lartësinë e duhur u shfaq edhe portieri i Flamurtarit, me dy pritje të bukura ndaj Balajt dhe Malës.
Ndeshja u zhbllokua në minutën e 76-të. Vlonjatët shënuan nga aksioni, por arbitri anuloi golin, pasi më herët kishte akorduar penallti për Flamurtarin. Nga pika e bardhë, Herald Marku nuk zhgënjeu, duke e ndalur topin në rrjetë.
Rezultati nuk ndryshoi deri në fund dhe Flamurtari festoi fitoren e parë. Pavarësisht suksesit, Flamurtari mbetet në vendin e fundit me vetëm pesë pikë, ndërsa Vllaznia vazhdon në krye me 19 pikë.
